Bernd-Marcel Löffler:

Schwaben:

Schwôba semmer
Kehrwoch hemmer,

isch es des, was d´Leut so moinat,
wenn se sich an Semsa loinat?

Guckat naus, auf d´Gass nôch onda
henn scho per Aug a Dreckle gfonda.

Gilfat na ond scheltet Kender,
wenn se schleifat gar em Wender,

kickat mit ma Ball em Sommer,
ond wenn an Eckball kommt – an Grommer

der fliegt ens nächste Pflanzbeet nei,
Jesses, was kennt schlemmer sei?

Semmer so? Semmer ganz andersch?
Tja, wenn da durch des Städtle wandersch.

Na siehsch, was Schwôba send fir Leut,
von Vaihenga bis Neugereut.

Semmer Mauler, Brägler, Bruddler,
Bästler, Putzer, Sachverkuddler?

Gemmer en dr Kär zom Lacha?
Henn em Schopf bloos Gartasacha?

Send, ned weil es grad so schee isch,
sondern zom Bossa evangelisch?

Sparat a Lebdaag auf was bsonders,
des mr nie kauft, wen verwonderts?

Denn a Geld, des b´hält mr besser!
Guat…. mr kauft a Vespermesser,

kauft a Sonndigshääs wenn´s alt isch hee
ond ned, weil s´alt a Glomp ond s´nei wär schee.

Mr bronzt beim Volksfest henders Zelt,
weil do henda koscht´s koi Geld?

Send des Vorurteil? Oder send´s koine?
Freilich send se´s – ja, des moin e!

Mir Schwôba send ja so galant,
send bescheida ond charmant,

send gradaus ond nie verdruckt,
ond weil´s ons stets em Kittel juckt,

semmer sportlich, fit, aktiv,
fahrat Rad, hengat über´m Lenker tief,

kickat, laufat, rennat, sauat,
niemôls mir der Nôchbr hauat,

ond wenn doch – na hôt´s an Grond,
ond a bissle isch jô gsond.

Mir send tolerant ond offa
tun auf Meisterschalen hoffa,

die dr VfB sott holla,
die die andre gleichfalls wolla.

Kenderfreundlich semmer ao,
ond henn Verständnis ao für´d Frau,

die meiste Leut sind knitz ond schlau,
ond manche henn an gloina Hau.

I denk, mir senn halt oifach Leut,
wie´s uff dr Welt so viele geit.

Schwôba gibt´s, des sen grad Seggel,
henn an Haufa Scheiß em Meggel,

sen schlicht gstrickt ond stets am Bruddla,
essat Brot grad bloos mit Kuddla.

Doch s´gibt ao andre, die sen häbig,
ond bloos dr Nôchbr isch so schäbig.

S´gibt viel Schwôba mit Kultur,
mit Witz ond echter Frohnatur,

kurz ond guat, s´gibt oifach Älles,
dr oi, der drialt, der oi môg Schnelles,

dr oi, der brengt sich ei ond schafft,
der ander bloos am Fenster gafft.

Mir send Leut grad ganz normal,
doch des oine isch fatal,

onser Sprôch stirbt langsam aus,
dr letzt löscht´s Licht em Schwôbahaus.

Wenn koiner schwäbisch kô ond schwätzt,
wer dann no die Heimat schätzt?

Wenn älles bloos Folklore isch,
wenn auf da große Essenstisch,

koi Äbbier kommt ond koine Rahna,
bloss no Fleisch oder Banana,

koi Gogomber, Prestling, Kraut,
koin Pfitzauf aus am Ofa schaut,

wenn koin Kehner me am Dach,
koin Hommler legt die Kiah meh flach,

wenn em Frühling ned Bagenga,
sondern Schlüsselblumen wenka.

S´wär halt gottsmillionisch schad,
wenn koiner hätt ihn mehr parat,

onsern Sprôchschatz, den Akzent,
den so gern mr schwäbisch nennt.

Drom bitt i den, der´s grad no kôo,
der sag doch oifach Strôßabôô,

ond ned U5, wenn er grad lauft,
dass er´s kaum mehr recht verschnauft,

wenn´s pressiert ond er muss quaddla,
kann grad no schiergar gradaus graddla.

Kaufat Weckle ei ond koine Brötchen,
sonst werdet ihr das Schwäbisch tötchen.

Zu dene, die´s ned könnat schwätza,
denn die will mr ned vergrätza,

sagat ruhig uff Deutsch des Meiste,
denn offen, wie mir sind im Geiste

kenna mir jô variiera,
ond tun beim Hochdeutsch ons blamiera.

Gedicht isch rom- ich will euch schona
Grad in Zeiten von Corona!